well dweller

اللعبة هذه بديتها بنصيحة من صاحبي وما كنت ناوي أكمل، وبما إنه ببلاش على القيم باس قلت خل أجرب، وفجأة شفطت مني 3 ساعات رغم إنه فيها أشياء واجد أزعجتني بالبداية بس ما قدرت أوقف لعبها.

شغل انه مطور 1 (نوعا ما) ولعبة مصقولة بالكامل شي يحتاج تصفيق .

القصة:

خفيفة ولطيفة، صراحة ما كنت مركز فيها حيل عشان أكون صريح، بس تصاميم العالم والشخصيات جميلة للعين فأغلب الشخصيات وقصصهم لهم تشارم.

بس لو تقولي شي حلو حيل؟ لا عادي صراحة.

بس اكثر شي حبيته في شي تجمعه يكون على شكل note فيهم رسمات حلوه صراحه يستحقون التجميع .

الموسيقى:

حلوة وجميلة أغلب الوقت بس منسية + أنا ألعب وأحط يوتيوب على جنب فمو مقياس كافي.

بصرياً:

اهني نتكلم، مثل لعبتي المفضلة هذه اللعبة هولونايت، فهذه تعطيك نفس الطعم، رسم 2D جميل ويخليك كل مكان تستانس فيه وتعرف إنك دخلت منطقة جديدة.

بس ما فيها التوجه الفني الخارق صراحة إلا ببعض الأماكن + تصاميم الشخصيات حلوة أغلب الوقت صراحة. في كذا منطقة أو تمثال بالأصح حبيتهم + البوس فايت في كذا واحد كان جميل جداً.

الشخصيات وبعض البوسات مناسبين للمكان، طفولية وسوداوية.

القيم بلاي وشوي هذرة:

اهني أساس اللعبة وأهم شي نحتاج نتكلم عنه، مثل ما كتبت فوق ميزة اللعبة إنها خفيفة وسلسة أثناء اللعب، ماكو شي يوقفك، كل غرفة عدو أو لغز وبس، ما فيها شي مزعج، ماكو باك تراكينق مزعج (بالبداية)، تلعب بدون لا توقف وماكو صعوبة نوعاً ما فتقدر تلعب وأنت مطفي مخك للآخر وأمورك تمام وتشوف نفسك فتحت كذا منطقة بسرعة وهكذا.

وكل ما تتقدم تحس إنك خلصت منطقة بسرعة وتنتقل إلى اللي بعدها، والحلو باللعبة ما تحط لك وين تروح وبنفس الوقت عندك كذا طريق.

مثل ما قلنا سلاسة اللعبة وتوزيع القدرات يساعدها بقوة لدرجة إنك تلعب بدون توقف بسرعة حيل، اللعبة تعطيك التنقل السريع بأي وقت تبي لو أنت بأصعب مكان . في غرف فيها تحدي بسيط المطور حاط لك مكان يعطيك شوي HP عشان تحاول كثر ما تبي بدال لا تروح وترد.

قدرات جميلة تاخذهم بوقت مناسب + تقدر تخلص اللعبة وبعدها تجمع كل شي 100% فلو تبي تقدر تخلص اللعبة بعدين تجمع كل شي (إذا جمعت 20 روح راح تحصل شي حلو لما تخلص اللعبة).

واجد أشياء مهمة تسويها بفلوس اللعبة واللعبة كريمة نوعاً ما، بس بالبداية أنصح تخلي عندك 2000 حق شي مهم وراح يفرق حيل معاك.

الأعداء والتحديات

والأعداء متنوعين وبعضهم مزعج جداً بس لأنه المطور ما يبي يزعج اللاعب فيحطه بروحه ويعطيك مكان كبير فحرفياً ما منهم فايدة.

• العلاج اللي عندك 1 أغلب الوقت ويرجع لك مع كل بون فاير وما يعبي كل طاقتك فهذا راح يكون معاناة لك ضد البوسات بالبداية.

الشي اللي كان صعب باللعبة هو الـTime Trials خصوصاً إذا تبي تسويهم بوقتهم (أنا سحبت عليهم لأنه صعبين علي، بس من حصلت باقي القدرات صاروا أسهل نوعاً ما، بس لا زال فيه كم واحد تبن + أنا ضعيف ضد الأمور اللي فيها وقت محدود).

المشاكل اللي منعت اللعبة من الكمال

تحكم - قدرات - عالم - بوسات، أغلب الأشياء نوعاً ما مثالية بس الحين نجي للشي أو الصوص اللي خرب كل شي وخلى اللعبة ما توصل للكمال وما تقدر تتعدى حاجز 8 من 10.

مثل مشاكل أغلب ألعاب الجيل، المطور يخاف يتحدى ويزعج اللاعب. في بوسين (اللعبة فيها 13-15 بوس) تعبوني شوي، الباقين عادي محاولتين بالكثير أنت مخلص منهم.

بس تخيل إني أقولك عادي لأنه باقي اللعبة المطور حريص إنه ما يزعجك، توزيع الأعداء + الـPlatforming على الرغم إنه عندك قدرات حلوة ويعرف يستغلها بس ما يبي يتحداك نهائياً ويعطيك شي شكلياً يخوف وبالأخير مجرد اقفز وانطر شوي وهكذا.

بالبداية ما تلاحظه بس مع الوقت تقول ليه قاعد ألعبها إذا بس أمشي وأقفز، ولو تسحب على كل الأعداء ما يفرق إلا ببعض الغرف، مو عيب بس الأعداء ما يعتبرون عائق لك وكأنه لك الخيار إنك تهرب أي وقت تبي.

يمكن تشوفون مبالغة بس اللعبة عندها المقومات إنها تكون أفضل وتحدي أكثر مثل خواتها.

الخاتمة

فوق هذا أعترف ما قدرت أوقف لعب، ممكن بسبب الأشياء اللي انتقدتها، عمر اللعبة 15 ساعة تاخذ كل شي فيها ويكفي هذا سبب ثاني.

عشان تستمتع باللعبة كل اللي عليك تسويه تطفي مخك وتلعب واللعبة تسوي كل شي رغم إنه ما فيه قايد لك بس المطور صممها بشكل سلس بدون لا تحس راح تحصل نفسك واصل 100%.

فممكن بدون تدليع المطور لي ما كنت راح أكملها للآخر.