Valor Mortis

المقدمة

أنا أحب تصنيف السولز لايك، ف غالبًا أي لعبة بالسوق فيها الشي راداري المزاجي يلتقطها.

ما أعرف ولا شي عن اللعبة بس لقيتها ب القيم باس وقلت خل أجربها.

بتكلم عن تجربتي المتذبذبة فيها. بس لو أبي ألخص تجربتي:

هل عندك الصبر الكافي لتحمل العيوب حتى تصل للأمور الجيدة؟

بصريًا والأجواء

لما تبدأ اللعبة، أول شي تشوفه مثل أي لعبة من المحرك اللي يشجع الكسل عند المطورين.

كل شي تحس إنك شايفه بألعاب ثانية، خصوصًا مع المقدمة الطويلة والمملة اللي ما ساعدت نهائيًا.

طبعًا ما نقدر ننكر إن اللعبة حلوة بصريًا، لكن محد يتحمس على شجر وتراب مهما كان شكلهم جميل، خصوصًا لما تكون شفت نفس هالأشياء بعشرات الألعاب الثانية.

بس من تكمل شوي شوي يبدأ المطور يبدع، وتصير اللعبة أمتع بصريًا، وعينك تبدأ تميز الطرق والمناطق صح، مو كله شجر وبس.

بعد عالمين تقريبًا، اللعبة تبدأ تطلع عضلاتها بالإضاءة والتنوع بالبيئة، وهني يبدأ التوجه الفني للعبة يبرز.

ف الصبر عطاني تجربة فنية حلوة حيل.

القيم بلاي وشوي هذرة

قبل كل شي لا تغير FOV، لأنه راح يخرب اللعبة عليك. خله طبيعي هو محسوب إنه ضيق ويضيف متعة حق الاستكشاف, يخليك تحسب حساب كل زاوية تروح لها .

منظور أول + سولز لايك + دوج + لياقة + باري + دفاع + هجوم خفيف + هجوم قوي.

L1 + L2 + R1 + R2 + دائرة + مربع + R3 + L3.

هذا طبيعي لكل قتال تقريبًا.

ف حط ببالك إنه مواجهة عدوين بنفس الوقت راح تكون صعبة مهما كان لفلك.

شنو يعني؟

أي قتال فيها مرهق نوعًا ما (إلا إذا أنت ممتاز ب الباري ف راح تكون أسهل وأفضل من تجربتي).

ف أنت ب السولز العادي تقدر تشوف الوضع وتعرف شنو تسوي. L3 العادي تقدر تتجنب بدون دوج، ولكن لأنه منظور أول إحساس جسدك ماعندك تقدير فعلي إنك تتجنب. صعب، مرات تسوي دوج وتلاحظ إنه حاشك ف الباري أفضل.

والمواجهات الي فيها أعداء واجد، الأفضل تنسحب و تقاتل كل واحد بروحه، أو تستعمل قدراتك وتهرب لأنك راح تنجلد.

كمثال: عدو قوي قدامك و في أعداء مزعجين وراه يضربونك بمسدس من مكان عالي , ف ماعندك وقت تصوب عليهم لأنك لازم تتعامل مع الي قدامك.

بس لا تخاف، المطور حط لك أشياء بديلة تساعدك على إدارة القتال مثل السحر والمسدس.

وعندك نظام البف الي ماحبيته، مؤقت وعلى نظام ITEM تستعمله.

عندك نار + نار بنفسجية لها دور ثاني + سم، بس أكثر شي استعملته النار صراحة وكان مكفي.

ولكن القيم بلاي هو أساس اللعبة، من تتعود عليه وترتاح شوي خصوصًا بداية اللعبة، المطور محترم نفسه.

خل أقولك تقسيم الأعداء عشان تفهم عدل شنو أقصد:

• عدو عادي (باري واحد يموت على طول)

• عدو متوسط (غثيث ويطول بس يمشي)

• عدو صعب (للأسف هذول مالهم حل إلا يصرفون وقتك لو كنت قوي)

• كلب

• سلايم (كذا نوع)

• سلايم سنايبر بالطوفه

• نحلة أو شي يطير

فتخيل تدش غرفة فيها 5 من هذول، مهما كنت قوي راح تنجلد. ف التخطيط حيل يفرق باللعبة.

الشي الخايس والي ما أحبه كان الSKILL TREE.

ماحبيت التقييد نهائيًا، لأني مجبور أرفع كل شي و أمشي من اليسار إلى اليمين , في فلوس لو تبي تعيد توزيع النقاط بس رحيمة شوي. أنا فلسفتي أرفع القوة لأعلى شي عشان ما أطول مع الأعداء العاديين .

حسيتوا كلامي سلبي صح؟ بس هذا شي عاجبني (مو الSKILL TREE):

إنه المطور يبيك تحترم اللعبة وتستعمل كل الي عندك عشان تمشي.

وهني نجي لليش حسن كمل اللعبة، ومو قادر يوقف لعب رغم إنه مزاج الألعاب مقفل.

الاستكشاف باللعبة ممتع وإدماني

عرفت شعور دارك سولز 1 أو بلود بورن لما تستكشف و تفتح مختصر للبون فاير.

نعم تصميم المناطق باللعبة جميل ومتداخل بقوة، هذا يبرز أكثر بعد عالمين أو 3.

توصل مرحلة ما تدري أنت بطريق جانبي ولا أساسي، وكل شوي يتفرع الدرب لدرجة إنه تاخذ وقت كبير وأنت تحوس وما تبي تلمس البون فاير لأنه عودة الأعداء راح يصعب الشي.

ف مثل ما قلت، اتخاذ القرارات باللعبة له دور كبير.

ف اللعبة بالبداية تملك تفرع واحد، بعدها ترجع للأساسي وخلاص.

من تكمل اللعبة تبدأ بالتفرع وتنوع الطرق، مرة باب + شي تطلق عليه بمسدس + قفز + قدرات أخرى.

ف المطور صمم العالم بشكل جميل يشجع إنك تطالع كل شي حولك، وهذا سبب رئيسي لصبري على عيوب اللعبة.

الأسرار كل مكان حرفيًا، لدرجة إني خلصت وباقي أماكن واجد سحبت عليها لأنه مالي خلق أموت وخايف.

عادي جدًا تشوف مكان مخفي بشكل بسيط وتروح منطقة كبيرة حيل فيها عدو مميز يعطيك مكافأة حلوة .

القصة و المهمات الجانبية

القصة تتكلم عن حقبة نابليون، وأنت جندي عادي مثل أي لعبة سولز رديت للحياة لسبب ما، وعندك قدرات خارقة + عالمك كله تحول للوحوش.

ف الحلو إنك تحقق بالشي هذا، وكل ما تمشي تنكشف القصة شوي شوي مع شخصيات تقابلها بالدرب وشخصيات ثانية تعطيك سايد كويست.

عادةً ما أهتم بالقصص ب السولز لايك، بس هذي فيها واحد يسولف عليك من فترة لفترة لقطت شوي منها، وفي عنصر كامل بعالم معين راح يكون ممتع إذا مهتم.

ماودي أفصل بالقصة لأني ماعطيتها حقها .

البوسات

تقريبًا 7–10 بوسات، منهم اللي يرجعون كأعداء عاديين، بس صراحة 2 أو 3 منهم بصريًا شي ممتع، وواحد منهم مميز حيل وراح تنصدم أول ما تشوف طريقة اللعب ضده.

ما فيهم تحدي نوعًا ما، بس ما تقدر تلعب ضدهم باستهزاء، ومثل ما قلت، إذا أنت ممتاز بالباري راح تستمتع معاهم أكثر مني.

الخاتمة مع العيوب والإيجابيات وسلامتك

مثل ما قلت، اللعبة تمتلك شي حلو ومفقود حاليًا، وهو إن المطور مو ماسك إيدك ويساعدك ويسلك لك مثل أغلب العناوين الجديدة.

لا، أنت وحيد بالعالم ولازم تلعب صح عشان تكمل.

التنوع بالأسلحة ممتع ويعطيك أكثر من طريقة تتعامل فيها مع الأعداء، والعالم حلو وأنت تمشي فيه، ما يجيك شعور إنك خلاص زهقت من المناظر.

لكن مو كل قرارات المطور كانت موفقة.

في كذا قدرة أشوف لو المطور عطاك إياها من البداية كان أفضل، لأني وصلت آخر اللعبة وفي قدرة تفتح لك كذا مكان جانبي تشوفه خلال رحلتك، بس المشكلة إنك خلاص واصل آخر شي، ولفلك عالي وسلاحك فل لفل، فما راح ترجع لأجل ولا شي.

والمشكلة الثانية بالقسم الأخير من اللعبة، تكديس الأعداء الصعبين مع بعض وتوزيعهم الغثيث يخرب التجربة، وعطاني شعور: اركض وبس، لا تقاتل.

وهني الفرق بين الصعوبة اللي تجبرك تفكر وتخطط، والصعوبة اللي هدفها تغثك أكثر من إنها تقدم تحدي ذكي.

ككل، تجربة جميلة بحلوها ومرها، وأشوفها تستحق الصبر رغم عيوبها، خصوصًا إذا كنت تحب الاستكشاف وتصميم المناطق المتداخلة.

تقييمي لها 7/10 كحد أقصى.

لأن في بعض الأماكن باللعبة تحس إن هدفها تغث اللاعب أكثر من إنها تقدم تصميم ذكي. (سكشن السم)

لازم عندك صبر عشان تستمتع فيها .