عن الموقع

السلام عليكم أول شي.

خل نبدأ من الأساس.. أو من الصفر؟

للأسف لما تكون موجود بتويتر من ٢٠١١ ما تقدر تتركه لو كان مسموم، ف صار عادة اني أتعرض لتنمر الـ for you. كل مرة تشوف أنواع من المحتوى اللي يعكر أو يعدل مزاجك، وأمور واجد ودي أكتب عنها ولكن سجن الحروف كان عائق. وبنفس الوقت ما لي خلق أرد وأنطر، ويجي أحد يتدخل وتتوسع النقاط، وبالغالب أمسح الكلام اللي كنت أبي أكتبه.

لو تتابع حسابي عدل — دايماً أختار اني أسوي كويت ريتويت لأنه ما لي خلق أناقش. وإن احتجت رحت للخاص. قبل، التويتر يحمس إنك تنشر رأيك وتستأنس، حالياً الأغلب وضعهم ميمز في ميمز ف ما له داعي عوار رأس.

عملي المفضل ون بيس صرت ما أسولف فيه بالتويتر، منها خوفاً من اني أحرق على أحد، ومنها ما لي خلق أناقش ربع «منو أقوى»، وإن وجد نقاش طريقته بالتويتر تنرفز وراح يضيع النقاش مع الوقت.

الزبدة: قررت أسوي الموقع عشان أنشر اللي أشوفه ورأيي بدون ما يناقشني أحد :). منها أرشيف، لأنه هذي آخر سنة لي بالتويتر.

السبب الرئيسي لوجود الموقع هو اني اشتركت بـ AI وخليته يسويه كشكل بس، وصدمني وسوّى كل هذا الأساس. وسهّل كل شي بالحياة ف أحرجني صراحةً. وبنفس الوقت منها أتدرب على الكتابة وأعود نفسي.

محتوى الموقع مثل ما تشوفون

• المراجعات

  ألعاب خلصتها وكنت كاتب مقتطفات من رأيي عنها قبل، ف أرجع لهم وأعيد كتابتها بأسلوبي.

• الرواية

  راح يكون في مقال ثاني يتكلم عن هذا الجانب، وإن شاء الله راح يكون تركيزي عليه أكثر بس أخلص من المراجعات والمقالات.

• المقالات

  أشياء عشوائية عن الألعاب، أنمي، مانغا، أفلام، مؤدي أصوات، معلومات عشوائية وهكذا.

شنو أبي منكم؟

الاستمتاع بالمحتوى وإنكم تكونون بخير، وأبي اقتراحاتكم للتحسين مع الوقت.

نقطة مهمة — أنا شخص ذوقي حيل يتغير مع الوقت، ف عادي تشوفني أنتقد شي الحين وبعد سنة أمدحه وهكذا.