Resident Evil 9

مقدمة سريعة:

هذي السلسلة بالنسبة لي أي شي قبل لا ألعبها هو 10 على 10، والسبب بسيط.

من الصغر RE2 بدايتي وللحين محفورة ذكرياتي معاها، وRE3 مشاعري للحين معاهم. نيميسيس كان رعب، وعلى الرغم إني أعيد اللعبة وللحين أخاف منها (RE3 عادي بالأسبوع أخلّصها 3 مرات)، فأحب السلسلة. ثم RE4 كان إدمان لا نهائي، جبت فيه كل شي وكان رهيب جدًا. ونروح للخامس اللي هو الأضعف عندي، وفوق هذا خلّصته فوق 5 مرات بسبب متعته وطور الـco-op، مع الألعاب الجانبية (Outbreak + فيرونيكا ما لعبتهم).

بعدها نزل السادس وما عجبني، عطيته فرصة 4 مرات، وشوي شوي السلسلة اختفت. لحد ما نزل السابع وسوّى لها إنعاش مو طبيعي، والباقي معروف.

خل نتكلم عن الجزء الرائع جدًا RE9.

أول ما تم إعلان اللعبة قلت حق الربع: هذي ما ألعبها إلا VR، وهذا سبب تأخري جدًا عن اللعبة. بس حلو إني نطرت وشفت وجهات النظر، والحمد لله ما انحرق عليّ شي يذكر. فبعد عذاب طويل، حاليًا اللعبة كاملة تنلعب VR بس تحتاج جهاز قوي.

قراري كان سليم، لأنه صج تجربة لا تُنسى ومن أفضل التجارب اللي عشتها. المحرك خارق جدًا بالإضاءة والأجواء وجاهز للـVR.

هل اللعبة تستحق؟ أكيد، كل السلسلة تستحق (إلا السادس ما حبيته).

— — —

بصريًا:

بعد الجزء هذا ما أقدر أشوف أي قيم بلاي ومقاطع من RE8، لهذي الدرجة الجزء هذا تميّز بالبيئة من ناحية الجودة والإضاءة وشكل الأعداء والأصوات. كل شي مصقول صراحة.

ودي اكثر أمثله اكثر كل شي فيها حلو بصريا

زيد على ذلك أنا لاعبها بالـVR، يعني أشوف شي يخرّع أكثر، لدرجة مرات ألعب 10 دقائق وأوقف شوي بسبب الرعب.

البيئة الوحيدة اللي ما شدّتني كانت منطقة الأكشن الكامل، غيرها كل شي ممتاز.

— — —

القيم بلاي وهذرة شوي:

كعادة ريزي، من البداية تبدأ اللعبة وما يضيعون وقتك. أول رعب كان لما تدش وكل شي ظلمة ويقولك شغّل الـflash، والظلام بالـVR مظلم جدًا، فأول مرة من الخوف صراحة ما قدرت أكمّل. المقدمة نفسها الديمو وعرض كابكوم تقريبًا، أول ساعة أو نص ساعة أنت عارف شنو راح يصير.

ملخص اللي راح تسويه: بغرايس أنت خايف وتحل ألغاز تحت ضغط، سواء زومبي أو عدو يلحقك كل الوقت أو بيئة ضيّقة مع شح بالموارد (اللعبة رحيمة نوعًا ما).

وبخصوص ليون، أقوى شخص بالعالم، ما راح تخاف من أحد وراح تمشي وتقتل (أكشن تايم أغلب الوقت).

لاااااازم تلعبها منظور اول .

تقييمي الاحداث باللعبة:

النصف الأول كله ممتاز جدًا جدًا.

النصف الثاني، أول ربع منه تلعب أغلبه بليون وكان الأضعف صراحة، كله أكشن × أكشن، وليون خارق جدًا رغم النيرف اللي عليه.

النصف الأخير أماكن النوستالجيا كانت لمسة جميلة صراحة، وللآخر اللعبة حلوة.

— — —

القصة واللور:

الجزء هذا يكافئ اللي لعبوا السلسلة كاملة ومدققين بكل شي ممكن.

بس أول شي خل نتكلم عن قصة الجزء هذا: تحقيق في حادثة قديمة صارت بفندق، احترق وماتوا فيه أشخاص منهم أم غرايس، وبطلتنا FBI وتجيها مهمة بعد سنين تروح للفندق وتحقق فيها.

ثم تبدأ اللعبة ونشوف الشرير يخطفها، وبسرعة اللعبة تقدّم لك ليون وهو يحاول يعترض الشرير، ومنها نعرف إن ليون وشيري يحملون فايروس.

ببساطة هذي البداية، ثم اللعبة تبدأ تتوسع شوي شوي، ما ودي أحرقها، بس ترجع لجذور القصة. فإذا أنت مدقق حيل راح تستمتع بالريفرنسات اللي ما تخلص.

— — —

نصائح للمتعة الكاملة:

1- لا تدقق حيل بالقصة، لأن فيه نقاط ضعف كبيرة، أو بعض الأمور تخليك تقول أوكي خلص.

2- خذ راحتك بالاستكشاف واقرأ الملفات لأن فيها قصص.

3- لا تلعبها كلعبة أكشن بحت، وحاول تستعمل البيئة اللي عندك.

4- الصوت باللعبة يفرق حيل ويعطي تجربة ثانية.

5- العبها بالمنظور الأول (حتى بليون).

— — —

عشوائيات:

لما تلعب بغرايس، تخيّل إن عندك حياة وحدة والعب بعقلية ما أبي أحد يلمسني.

ليون لو كان عدو، السلسلة خلصت من البداية.

فيه منطقة شبه عالم مفتوح، وهذا كان التوجه الأول، ناوين تكون عالم مفتوح + أونلاين، والحمد لله ما صارت لأنها راح تفشل، بس المخرج فهم الشي ووقف.

حاولوا بالبداية يسوون رعب بليون بس ما ضبط معاهم، أو كان شي غير منطقي لأن الأخ خارق.

أم غرايس شخصية قابلة للعب في Resident Evil Outbreak.

شعر غرايس شدّوا حيلهم فيه بشكل غريب.

— — —

الإيجابيات:

الأجواء + الصوتيات + الإضاءة، أي شي بالجانب التقني مرعب جدًا وممتاز.

المنظور الأول والثالث مصقولان وكل واحد له تجربة.

تحس بالفرق بشكل كبير لما تلعب بغرايس أو ليون.

المصحّة بروحها تأخذ تقييم ثاني.

أداء غرايس خيالي، لدرجة إنك لما ترد لليون المتعة تقل نوعًا ما.

السلبيات:

ليون حيل قوي بالرغم من الظروف.

وجود ليون حلو وفيه مشاهد قوية له، بس جزئية العالم شبه المفتوح كانت ضعيفة حيل وأكشن بحت.

فيه مكان معين نوستالجيا مليون، تمنيت يكون أطول.

القصة وارتباطها بالأجزاء القديمة، مرات تقول منو يتذكر كل هذا.

— — —

الختام:

تجربة لا مثيل لها بالـVR، أحسن شي جرّبته، بس تحتاج جهاز قوي حيل.

ألعاب السلسلة كلها لها طعم خاص، فاستمتع فيهم ولا تخلي الأقليات يخربون تجربتك.