اللعبة، كل اللي سمعت عنها كلام سلبي صراحة. من خلال تويتر، أتوقع إنهم يسبّون الجزء 2 أو 3، بس الأغلب يمدح الأول. المهم، انطباعي عن اللعبة من بعيد هو إنها GTA تقليد أو رخيصة.
فالريميك لما نزل، بعد سنة أو سنين حصلتها ببلاش. فقلت: مو خسران، أعطيها فرصة ساعة.
هل اللعبة تستحق أم لا؟ اليوم راح أقولك.
في ألعاب تنلعب مرة فقط، ومن تخلصها خلاص تنتهي. أنا أشوف اللعبة من النوع هذا، فالأفضل لا تاخذها بسعر كامل.
بصريًا:
جميلة جدًا، وبعالم حلو صراحة. الكاست ممتاز، والتمثيل فيها حلو. كل شي فيها جميل بما إنها ريميك بالكامل.
أحب الألعاب اللي تعرف إنها سينمائية وتجيب ناس تعرف تمثل، مع مؤدين أصوات يعرفون اللي عليهم.
في مهمة فيها مطر وليل للحين أتذكرها، غير السباق (ما راح أقول شنو).
ككل تجربة ممتازة.
القيم بلاي وهذرة شوي؟
"خل أعطيك رأيي بدون فلتر، اعتبرها فيلم ولا تطلب منها الكثير.
عالم مفتوح وشرطة ومطاردات، لو تبي شي جانبي موجود، بس الحلو فيها صراحة لما تمشي بالقصة دائمًا راح تاخذ متعة كاملة: أكشن، تمثيل، مطاردات بالسيارة.
في مهمة مشهورة جدًا راح تعذبك بس ممتعة صراحة. ما كانت صعبة بالنسبة لي، بس أتذكر إذا لعبت أي شي راح تموت.
في خيار صعوبة كلاسيك، بس ما جربته، لأن اللعبة أحلى شي فيها اللي راح تعيشه معاها."
تسلسل القيم بلاي:
مشهد > خل نروح المكان الفلاني بالسيارة > لما توصل يا مشهد ثاني أو أكشن > ثم مطاردة
مو عيب، بس ضروري تعرف الشي قبل لا تلعب.
القصة:
https://pressakey.com/gamepix/6726/Mafia-Definitive-Edition-242868.jpg
أول شي حبيته إنه الطابع كلاسيكي 1930 + إيطالي، فإذا شفت فيلم العرّاب أو أي فيلم مافيا، على طول يجيك كليك شنو أنت داخل عليه.
اللعبة ما قصّرت إنها توريك كل شي بهالجانب خلال 10 ساعات، أغلبها قصة وتنقل سريع بدون لا تحس اللعبة طولت أكثر من اللازم.
القصة عن شخص بسيط إلى رجل مافيا. راح تعيش أغلب التفاصيل مثل تجربة أفلام المافيا، من ناحية ربعك وقائدك وأعداءك، والأهم نفسك ومبادئك.
ومثل أي فيلم مافيا، بالبداية الأمور مغرية جدًا وتستانس، ثم شوي شوي تبدأ تشوف مساوئ العالم هذا.
عشوائيات مهمة:
أفضل الألعاب اللي نزلت مع مافيا بـ2002:
https://i.redd.it/kqfgfa6j32qe1.png
سنة مرعبة صراحة :)
اللعبة الأصلية نزلت 2002 للـ PC، وصراحة توني شفتها وكانت مرعبة تقنيًا، بس طبعًا من يوتيوب.
بعد سنتين نزلت على كونسول، بس ما كانت بقوة الـ PC وتجربة مو كاملة.
إذا ما تسوق السيارة عدل ولا تحترم القوانين، تلحقك الشرطة :).
تجربتي معها على PC، فما أدري عن أداء الكونسول.
طريقة الاستمتاع باللعبة:
1- اللعبة عاملها إنها فيلم.
2- لا تسوي شي جانبي وتحاول تكتشف عيوب اللعبة.
3- اقرأ واسمع عدل، لا تسكب. حيل قصيرة اللعبة، والأفضل تلعب شوي شوي، ساعة باليوم أو ساعتين.
4- إذا ما تحب جو كلاسيك مافيا وستايل واقعي بحت، ابتعد عنها أفضل. (مع إني أنصح بتجربة طعم جديد < في مقال عن الشي)
الإيجابيات والسلبيات والخاتمة:
مثل ما قلت فوق، اللعبة تعتبر فيلم كامل تعيشه بتفاصيله مع البطل. التمثيل جميل جدًا، والجرافيكس يساعد الشي.
اللعبه عارفه نفسها و نقاط قوتها وين ولعبت عليها ونجحت صراحه .
السلبيات موجوده بس انت تقدر تخلي تجربتك شبه كامله اذا عاملتها كفلم .
هل راح العب مافيا 2 و3؟ لا حالياً. إذا كنت لاعبها، عطني رأيك: هل اعطيهم فرصه، ولا أحافظ على ذكرياتي مع اللعبة؟