نظارات الواقع الافتراضي

مقدمه بسيطه عن وضعي مع المجال :

كانت اقل من ديمو حتى تعتبر بس عجبني المجال بس وقتها ماكنت لاعب شرس وبس نظامي ps4 بس للحين اتذكر شعور اول بعدها ب دبي جربت و عجبني الوضع

بس لازم pc+ setup كامل و عوار راس غير السعر

مشت الايام وجربتها عن طريق psvr الاولى عند صاحبي لعب كانت انه غواص و كانت تجربه اكثر من لعبه حقيقيه ولعبه ثانيه كانت حلوه (Until Dawn RUSH OF BLOOD)

كانت حلوه و لكن مكتبه الالعاب ما تشجع و بنفس الوقت الواير و حجم الجهاز كان عائق

(ماخلصت بعد المقدمه مطوله)

و استمرت الحياه الى ان جربت lightsaber على htc كانت اتوقع و بصريا كانت جميله و مو سهله مثل ما تشوفون باليوتيوب ونفس العائق مره اخرى الصوره مثال

(للحين ماخلصت المقدمه)

نسيت المجال او صرت ما اهتم له لحد ما شفت اعلان ل ميتا كويست 3 ( التاريخ 2023 ديسمبر)

جهاز ويرلس + وزنه خفيف + standalone < يعني ما تحتاج شي شغل و العب

بعدها اخذت وقت طويل و انا اشوف اليوتيوب و ريديت و ابحث عنه عيوب ومزايا والكلام هذا
بعد بحث طويل جدا و استنبط الحقائق (لانه الاغلب سبونسر ف راح يجاملون) استغرق البحث ( 12 ساعه بس)

ثم حصلته ب الكويت ب سعر 135 دينار (436 دولار ) ما يتطوف ف اخذته . (خلصت المقدمه )

— — —

التجربه الاولى للجهاز و الانطباع الاولي :

وقتها يجي اشتراك مع الجهاز نفس فكره البلس لمده 6 شهور ببلاش
في مكتبه + كل شهر 3 او 2 لعبتين تاخذه ببلاش
وكانت الخيارات جميله جدا

لما شريتها كنت مهتم بالالعاب الحركيه مثل السيوف والدرع وامش وطق وتحرك بسرعه و هكذا وكانت جميله التجرب و من غير اي تقطيع ولا لاق ف شعور رائع جدا مع جوده ممتازه(قبل لا اسوي الخطيئه) ...

الستور حيل ممتلى بالالعاب منها الفاشل والبايخ ومنها الممتاز الي محد درى عنه و نسبه كبير فري ونسبه كبيره عندهم trail + demo وعندك خيار الريفود رحيم.

ميزه الpassthrough خارقه جدا بدون لا تشيل النظاره تقدر تشوف وتكلم الي حولك

و تتأكد من محيطك + قبل لا تلعب تحط لك حدود اذا قربت منها يطلع لك لون ازرق ك تنبيه ف ماله داعي تخاف انك تدش او تطق الطوفه .

و هذه تفتح لك اقوى مميزات الجهاز والي هي mixed reality game شي مبهر وما تحس فيه الا اذا جربته .

بشكل بسيط التجربه الاولى ممتازه جدا وناجحه لحد ما نوصل لاول عيب بالجهاز الا و هو البطاريه . حسب اللعبه بس عمرها ساعه فقط (50-110 دقيقه عشان لا تزعلون)

و شحنها بس ال18 واط فراح يكون بطيئ

يعني تلعب ساعه ثم تشحنها وتنطر ساعه او اكثر

ولاااااااازم تحافظ على البطاريه عشان تضمن استعمالك للجهاز سنوات

الحمدلله انا محافظ و الامور طيبه .

بعد ما خلصنا المقدمه الثانيه

الهدف من المقال اني اقنعك تدخل العالم ف راح اركز حاليا على الاشياء الحلوه فقط و اتجنب السلبيات اخليها اخر شي ف تحمل

— — —

طريقه اللعبه و الراحه :

قبل لا تشتري اي لعبه بالستور راح تحصل كلمه COMFORT وتعرف هل اللعبه تحتاج حركه واجد وهل فيها خيار الجالس مود وهكذا بس الي ابيك تفهمه انه المتعه حسب نوع اللعبه الاكشن و المسدسات لازم واقف و عندك مساحه (راح نفصل فيها اكثر)

وفي العاب الغاز و انت قاعد تقدر تسوي كل شي و راح تكون تجربه ممتازه

وعندك نقطه قوه ROOMSCALE ب اختصار تخيل انه غرفته تصير هي مكان اللعب

مو كلهم مصقولين بس يسوون التجربه لازم.

الحين نتكلم عن اهم شي بالجهاز الالعاب .

اول مصدر هو المتجر الرسمي و الي متروس خياس ولا يحط لك الالعاب الممتازه بوجهك

ف الافضل انك تبحث و تشتري من تيلفونك اسرع بس ما يضر انك تتصفح لانه خيارات FREE + DEMO واجد

الخيار الثاني انك تسوي خطوه وتفتح المطور مود وتقدر تفتح متجر ثاني و انصح بشده لانه يفتح لك تنزل مودات و العاب فيها مود ( يحتاج PC اول مره (ممكن لا))

في ميزه حلوه اذا عندك ربع وهي referral link ب اختصار اذا شريت لعبه يعطونك خيار ترسل رابط و الي يشتريها له خصم 10% او 20%

و نفس السوني تقدر تخلي مكتبكم مشترك انا سويتها بالبيت ف ماادري اذا تصير من مكان بعيد .

نجي الحين (اخيرا) عن ليه VR يعطيك نظره ثانيه للالعاب و الشعور الي فيه ب اي لعبه صعب ينسى مقارنه بلعبتك المفضله .

شعور انك انت تسوي الي ببالك غير العدو عند درع و مزعجك ب اختصار انزل بجسمك بالصج و طق رجله , قرب حيل وحط المسدس من فوق وارمي , ب ايدك اليسار شيل درعه و اطعنه وهكذا , اخذ اي شي من الارض و احذفه عليه انتظره وسو باري .

تجنبه عن طريق تحريك جسدك الحقيقي , اقفز... لا هذه خطره .

باللعبه لما تدش قلعه .. انت تمشي بالكنترولر و ما تحس بحجمها و منظورك محصور حسب اللعبه طبعا . بالVR لا تحس بالضخامه و تقدر تطالع اي مكان وانت تمشي تلاحظ انه كبير غير البيئه الجماليه (حسب المطور) التوجه الفني جدا يفرق بالVR

مو شرط جوده عاليه و خلاص .

نبي ناخذ مثال سريع لعبه الملاكمه ... مهما سوو لعبه ب VR راح تكون افضل .

ما ابي اعطي امثله الحين بس كمثال(The Thrill of the Fight 2) تخيل انت بغرفتك تقدر تلاكم شخص بمكان ثاني وجربتها كانت تجربه مرهقه اكثر شي بالحياه من التعب بس مستحيل تنسى . ( في طور قصه و تمرين تشوف قوه لكمتك )

ونفس الشي مع تصنيف الRHYTHM GAME VR

يجونكم ب اشكال وانواع و الافضل منهم تمارين الرياضه يعني الجهاز يصير حق لعبه وحق لياقه وصدقني لما اقولك انه يحتاج لياقه ..

— — —

ملخص اذا شريته شنو تقدر تسوي فيه غير اللعب:

• يوتيوب سوشل ميديا

• رياضه > تحرق بقوه

• تشوف فلمك المفضل او انمي ومسلسل

• تجارب لانه صج في بوتنشال ما يخلص (محاكي العاب قديمه على vr)

— — —

اشياء تنتبه منها :

• الشحن بس اشحنه بالرسمي

• لا ترفع الاضاءه حيل

• احرص على انه يكون عندك مساحه قبل لا تلعب والسقف مو نازل حيل

• motion sickness في ناس تحس فيه بالVR ف انتبه في خيارات تحميك في ناس حيل تتأثر + تتعود عليه مع الوقت .

التجربه الافضل اذا عندك ربع فيه صراحه العاب الجماعيه ما تخلص و مهما كانت راح تكون ممتعه ( انا ماعندي :)

الحين بعد ما عورت راسكم راح اعطيك توصيتي شنو تلعب اول ما تشتري الجهاز .